Ya lelo, sala lelo! Kozela lobi te
Soki osepeli na makambu nalobeli yo, luka osalela yango. Kozela te, tango eleka, sima okoma kolelalela.
Nayebi ete, mbala mingi ezalaka lokola kolemba. Likambo okoki kosala na ngonga, ozali komona neti bakangi yo maboko. Molimo etikali polele, pe ngonga eleki. Eyelaka ngai pe Mwa Likambo ya kosala sikoyo, olekisi tango. Na sima, lokola esalami te, eboti mindondo.
Kosala likambo, ezali mokumba monene.
Tozwa ndakisa osalaka na kompani. Ekosenga yo, olamuka na tongo, ata pongi kutu nanu esili te. Mbala mosusu, ozali ata na tango ya kokanduka te. Osukoli nzoto mbangu mbangu. Soki eloko ya kolia ezali, olei. Soki pe ezali te, okei kaka bongo. Pongi nanu esili te, ezosenga owela mituka po okoma na ngonga na mosala.
Tango pe okobanda mosala, mokonzi azali kozela osilisa mosala apesaki yo. Soki mosala ya bakiliya, moko na moko azali kotuna oyo ya ye biloko. Mbala mosusu, okopema ata te banda obandaki tii okosilisa.
Na boye, ekoki kozala na nzela, moto azala na bolembu ya kosala. Kokende mosala banda mokolo ya mosala moko tii mokolo ya poso, ezali pasi.
Kasi, mokili ndenge elengelami na moyi ya lelo, soki osali bongo te, oponi nzela ya nzala. Makambo ebele, okozala na makoki te ya kosala yango. Mwa lifuta oyo ezwamaka na nzela ya mosala, esungaka po na kobika na bomoyi.
Toloba nini? Tosalaka kaka po na lifuta ya mosolo? Te.
Ezali pe na misala misusu, tosalaka yango po na lifuta ya mosolo te, kasi po tokokisa polele to bosenga oyo ekoki komonana na bomoyi na biso.
Ndakisa, tokombaka ndaku po esika tofandi ezala peto. Na boye, tokokimisa makono ndenge na ndenge oyo ekokaki kokoma. Soki tokombi Ndaku te, putulu ekotonda, bosoto ekoyikama pe tokozala na bomoyi ya malonga te.
Misala mosusu ezali misala ya komanyola makambo. Tokomanyola (concevoir), tokososola (analyser), tokokomola (kodécrire) pe tokomwanga (programmer) likambo songolo po ete eyano oyo ekobima na suka ya makanisi na biso, tokoka kobimisa eyano na mokakatano oyo epesamelaki biso.
Ndakisa, soki mobali na mwasi na ye bazali koyokana te, ekosenga ete moko na moko asala mosala ya komanyola pe kososola. Yango ezali po na koluka ndenge nini kosukisa kozanga boyokani oyo.
Ezala mosala ya lifuta, ezala mosala ya kobongisa nzinganzinga, ezala mosala ya komanyola, tomoni ete, soki basali yango te, ekomisalama te pe suka na yango, ekomema pasi, mikakatano to bwale.
Mosala nyonso esalamaka kaka na esengo te. Ezalaka na mbala mingi posa, to pe, makasi ya kosala yango ezali te, kasi lotomo, esengi kosala yango. Esika wana nde mokili ekabwanaka na maboke mibale ya bato : bato ya molende pe bagoyigoyi.