Kimopaya na Beljiki,tokosamba tii wapi?
Tokozalaka te tango nyonso kolekisaka tango na biso na kolakisaka ete bomikotisi na bomoyi ya mboka mopaya ezali na litomba po na mboka yango.
Tokoloba tango molayi boni, ete, kimopaya ezali likambo te. Loposo ya moto ezali mindondo te, tokoloba yango tii wapi?
Tokoloba tango molayi boni, ete, bamizilima nyonso te nde bazali baterroriste. Mindele nyonso te nde bazali baraciste. Bayindo nyonso te nde bazali na goyi-goyi. Tokoloba yango tii wapi?
Ezali na makambo ya tina oyo esengeli tolobelaka! Makambo oyo ekotisaka mbongo pe etongaka bomoyi ya bato na mboka.
Na lingomba Mabiki, kolekisela biso tango te na kolukaka kosambaka po na koloba ete, Bayi-Afrika oyo bafandaka na Beljiki, na nini bazali tina po na Beljiki. Wana yo moto okoyeba, etali biso te. Tikala kaka na position wana, toza na tango te ya kokipaka yo.
Toza na tina na Beljiki. Tozosala po tozala na esika lokola bato na kati ya bato na mboka oyo eyambi biso. Tondimi mikumba na biso pe tokoboya makoki na biso te.
Mpaku, tokofutaka. Mpaku ya fulu, tofutaka. Oyo ya nzela, tofutaka. Mosala, tolukaka, tozwaka, tosalaka yango.
Soki balongoli biso, tokotaka kisomele pe tofutamaka bo somele nyonso afutamaka na Beljiki. Soki tobeli, ezali makoki na biso ya kobikisama na lopitalo.
Ezali makoki po na bana na biso kokende kelasi, bakendeke kelasi, bazwaka pe na sima balukaka mosala, lizita ekangami pe ebandeli.
Yango nde babengaka bomikotisi pe bonsomi (intégration et citoyenneté). Oyo etikali,...eza tuba-tuba vova!
Bo bato, moto oyo azali kobunda po na kotikala na bomoyi, moninga moto asengeli kosunga ye!